Gipamatud-an sa Estados Unidos ang ilang masaligan ug lig-on nga mutual defense commitment sa Pilipinas dungan sa pagsaulog sa nasod sa ika-128 nga anibersaryo sa Adlaw sa Kagawasan gahapong adlawa, Hunyo 12.
Pinaagi sa usa ka mensahe gikan sa US Department of State, mipakatap si US Secretary of State Marco Rubio sa iyang mainitong pagbati ngadto sa katawhang Pilipino sa ngalan sa tibuok kagamhanan sa Amerika.
Gihatagan niya og importansya ang lawom nga alyansa sa duha ka nasod nga nagsugod pa sa kooperasyon sa panahon sa World War II, ug nagpadayon pinaagi sa pipila ka dekada nga diplomatikong relasyon.
Tungod niini, gikatakda usab nga saulogon sa duha ka nasod ang ilang ika-80 ka tuig nga diplomatic relations, gawas pa sa ika-75 nga anibersaryo sa 1951 Mutual Defense Treaty nga gipasiugdahan usab ni Rubio.
Nagpabilin nga maunongon ang Amerika kauban ang Pilipinas, nga maoy naglingkod isip Chair sa ASEAN karong tuiga, isip usa ka higala, kauban, ug kaalyado sa pagmintinar sa usa ka abli ug gawasnong Indo-Pacific Region.
Gihisgutan usab ni Rubio ang pagpalawom sa kooperasyon sa ekonomiya sa US ug Pilipinas pinaagi sa Luzon Economic Corridor ug ang pagtukod og luwas ug lig-on nga supply chain alang sa mga kritikal nga mineral.
Gawas niini, gipasigarbo usab sa kalihim ang lig-on nga relasyon sa mga katawhan sa duha ka nasod, diin kapin sa upat ka milyon nga Filipino-American ang kasamtangang nagpuyo sa US, samtang kapin sa 750,000 ka mga Amerikano ang nagpuyo sa Pilipinas.
Sa katapusan, naglaum ang opisyal sa US nga mas mapalapad pa ang pagtinabangay sa duha ka nasod aron isulong ang kalinaw, seguridad, ug kalamboan sa mga mosunod nga katuigan.
