Gipailalom sa temporaryong leave gikan sa ilang katungdanan sila si Ateneo Blue Eagles men’s basketball team Head Coach Tab Baldwin ug Team Manager Christopher “Epok” Quimpo samtang gipahigayon sa Ateneo de Manila University (ADMU) ang usa ka fact-finding inquiry kabahin sa pagkalumos sa ilang mga magduduwa nga sila si Rene Clert Baterbonia ug Divine Adili.
Kini ang gipahibalo ni ADMU President Fr. Roberto C. Yap, SJ pinaagi sa usa ka opisyal nga pamahayag nga giluwat niadtong Huwebes, Hunyo 11, agi og pagsunod sa direktiba sa Board of Trustees nga mopahigayon og subsob ug masusing imbestigasyon sa maong trahedya nga mikalas sa kinabuhi sa duha ka atleta.
Matod ni Yap, tumong sa maong temporaryong pagpahuway sa katungdanan nila ni Baldwin ug Quimpo nga mapreserba ang integridad, kagawasan, ug pagka-patas sa gihimong fact-finding inquiry.
Gipasabot pa sa opisyal nga aron masiguro nga ang tanang nalambigit makatabang ug makakooperar nga gawasnon nga walay bisan unsang pagpamugos o pagpabor, gikinahanglan nga mopalayo una sa pwesto ang maong head coach ug team manager samtang nagpadayon ang pakisusi.
Gihatagan usab og gibug-aton sa pangulo sa unibersidad nga hingpit ug transparent ang gihimong pakigkooperar sa tunghaan ngadto sa mga otoridad ug mga ahensya sa kagamhanan nga naghimo usab sa ilang kaugalingong imbestigasyon sa maong insidente.
Nihangyo usab si Yap og padayong pag-ampo gikan sa publiko alang sa dinalian nga katin-awan sa nahitabong trahedya ug alang sa pamilya sa mga mitaliwan nga atleta sa pagsagubang niining ngitngit nga bahin sa kasaysayan sa unibersidad.
Kahinumduman nga opisyal nga gipahibalo sa Ateneo de Manila University niadtong Hunyo 8 ang masulub-ong kamatayon nila ni Baterbonia ug Adili human sila nalumos atol sa gipahigayon nga team-building activity sa Aurora.
