Masaligon si Department of Public Works and Highways (DPWH) Secretary Vince Dizon sa gibug-aton sa ebidensya nga ipresentar batok sa ig-agaw sa presidente, nga si Leyte Rep. Martin Romualdez.
Sa dihang gipangutana ang kalihim nganong wala pa gihapoy actual nga kaso batok kang Romualdez bisan pa sa daghang mga resource person nga naghisgot kaniya sa mga hearing sa Senado ug House of Representatives.
Sumala ni Dizon, ang proseso sa legal batok kang Romualdez nagpadayon ug sigurado nga kini ipasaka sa korte, sama sa Sandiganbayan.
Masaligon ang kalihim sa gibug-aton sa ebidensya nga ipresentar batok sa kanhi lider sa House nga sumala niya, siya mismo ang nag-refer ug nagsumite sa Office of the Ombudsman, diin nahitabo kini niadtong Nobyembre 30, 2025.
Dugang ni Dizon, ang maong ebidensya mao ang hinungdan sa korte sa pag-isyu og freeze order sa mga kabtangan sa presidential cousin ug hingpit nga pagdili kaniya sa pagbiya sa nasud.
Gipasiugda usab sa kalihim nga bisan daghan ang gusto nga mapasakaan og kaso o mapriso ang kanhi lider sa House, siya miingon nga ang kaso kinahanglan nga moagi sa hustong proseso, sama sa mga kaso ni Sen. Jinggoy Estrada ug uban pa nga karon natanggong tungod sa mga flood control projects.
Mahinumduman nga si Romualdez nagsilbi nga Speaker sa House sa dihang giumol ang 2025 National Budget, nga giisip nga usa sa labing korap nga nasudnong pondo, tungod sa giingong ilegal nga pagsal-ot.
Nagserbisyo usab isip tsirman sa House Appropriations Committee niadtong panahona si Zaldy Co, kinsa nag-atubang usab og daghang mga kaso tungod sa pagkalambigit sa iyang kompanya, ang Sunwest Corporation, sa ghost flood control project.
