Nagpagawas og bag-ong alegasyon ang mga kanhi bodyguard ni kanhi Ako Bicol Party-list Representative Zaldy Co human ginganlan ang ubang mga opisyal sa gobyerno ug mga personalidad sa media nga giingong nakadawat og kwarta gikan sa kanhi magbabalaod.
Sa usa ka press conference, ang abogado sa grupo, si Atty. Levi Baligod, nagpaila sa upat ka bag-ong mga saksi.
Diin usa kanila miingon nga nalambigit siya sa paghatud sa mga maleta nga giingong alang kang kanhi House Speaker Martin Romualdez ug Senador Erwin Tulfo.
Ang mga nagpailang “bag-men” ni Co naglambigit usab kang Commission on Elections (COMELEC) Chairperson George Garcia, Chairman George Garcia, sa giingong pagdawat og kwarta. Apan hugot nga gihimakak kini ni Garcia ug gitawag nga bakak ang mga alegasyon.
Laing kanhi aide miingon nga nakahatud sila og upat ka maleta nga puno sa kwarta sa balay ni Senador Francis Escudero.
Nagpakita usab og pipila ka mga litrato ang mga saksi nga giingong may kalabutan sa ilang mga pahayag. Apil niini ang litrato nila ni Senador Kiko Pangilinan ug Sharon Cuneta uban sa pipila ka mga staff ni Co. Apan, wala sila mohatag og bisan unsang detalye kon unsang paglambigit sa ilang mga pasangil.
Nagpakita usab sila og litrato uban ni MMDA General Manager ug kanhi PNP Chief Nicolas Torre. Sumala nila, kini gikuha sa dihang giawhag sila nga bawion ang ilang nangaging mga pamahayag sa Senado.
Samtang, ang kanhi bodyguard miingon usab nga kunohay naghatud sila og mga paper bag nga puno sa kwarta ngadto sa pipila ka mga personalidad sa media, lakip na ang TV journalist nga si Arnold Clavio ug kolumnista nga si Mon Tulfo.
Diha-diha dayon nga gihimakak kini ni Clavio ug gihagit ang mga nag-akusar nga magpakita og ebidensya.
Samtang, gikataw-an lang ni Mon Tulfo ang pasangil ug gipangutana kon giunsa nga masulod ang susama ka dako nga kantidad sa kwarta sa usa ka paper bag.
