Giaprobahan sa Cebu Provincial Board ang upat ka managlahing resolusyon atol sa regular nga sesyon niini niadtong Lunes, Hunyo 15, 2026, nga naghatag og kinatibuk-ang P25 milyon nga tabang sa kalamidad ngadto sa upat ka mga probinsya sa Mindanao nga naigo sa linog.
Ang mga resolusyon, nga gisulat ni PB Member Red Duterte ug giaprobahan sa kadaghanan atol sa sesyon.
Ang tabang pinansyal tubag sa pormal nga hangyo gikan ni Governor Pamela Baricuatro, diin sa usa ka sulat ngadto kang Vice Governor Glenn Anthony Soco, nangayo si Baricuatro og hinanaling aksyon gikan sa lokal nga konseho aron matabangan ang mga lugar nga naigo sa magnitude 7.8 nga linog niadtong Hunyo 8.
Ang pagbahin-bahin sa tabang pinansyal mao ang mosunod:
Probinsya sa Sarangani: P10,000,000
Probinsya sa South Cotabato: P5,000,000
Probinsya sa Davao Occidental: P5,000,000
Probinsya sa Davao del Sur: P5,000,000
Subay niini, gikabutyag ni Baricuatro nga ang dugang nga pondo nga ipagawas i-charge sa Assistance to Local Government Units (LGUs) appropriation ubos sa Governor’s budget item basi sa giaprobahan nga 2026 Annual Budget.
Samtang, padayon usab nga naningkamot ang Cebu Provincial Disaster Risk Reduction and Management Office (PDRRMO) nga makatabang usab sa mga biktima sa naasoyng kalamidad.
Gani, gikumpirma ni retired Col. Dennis Francis Pastor, pangulo sa PDRRMO nga ang Cebu Provincial Government nagpalihok na og mga resources aron matabangan ang mga apektadong lugar, lakip ang General Santos City, Sarangani, South Cotabato, Davao del Sur, ug Davao Occidental.
Sumala ni Pastor, giaprobahan sa Kapitolyo ang hinanaling tabang pinansyal aron suportahan ang mga operasyon sa pagbangon.
Ang PDRRMO nagpadala usab og mga kinahanglanon nga suplay sa hinabang, lakip ang mga food packs, tubig nga mainom, mga hygiene kits, ug mga gamit sa pagkatulog para sa mga pamilyang nawad-an og balay.
