Nag-concede ug pormal nang gidawat ni Senador Alan Peter Cayetano nga dili na siya ang Senate President human mibalhin si Senador Joel Villanueva sa bag-ong majority sa Senado.
Ang maong lakang gilauman nga makahatag og igong gidaghanon sa boto aron makapili og bag-ong lider sa Upper House.
Sa usa ka pahayag karong buntaga, Miyerkules, Hunyo 17, gikumpirma ni Cayetano ang iyang pagtugot human sila nagkaestorya ni Villanueva, ug iyang gipahibalo nga dili na niya kini babagan.
Matod niya, ang liderato sa usa ka demokrasya dili permanente—kini gihulam lamang ug dili gipanag-iya.
Gipaabot usab niya ang iyang pahalipay ug kooperasyon sa bisan kinsa nga lehitimong pilion sa Senado. Gipasiugda ni Cayetano nga usa ka dakong dungog sa iyang kinabuhi ang pagserbisyo isip Senate President.
“Offices are temporary, titles are temporary, even majorities are temporary — but your right to the truth is not. I promise you, we will get to the bottom of this. We will find the masterminds. We will hold them accountable,” dugang pa sa senador.
Bisan pa man sa iyang pagkanaog sa pwesto, misaad si Cayetano nga magpadayon siya sa pakigbisog alang sa kamatuoran, bisan unsa pa ang iyang posisyon o titulo.
“I may leave the position of SP, but I am honored to still be your PS — your Public Servant,” panapos ni Cayetano.
