Pormal na nga natapos ang Special Session sa Kongreso human sa pag-apruba sa mga importanteng prayoridad nga balaodnon ug ang resolusyon sa panaglalis sa liderato sa Senado.
Subay sa Proclamation No. 1318 ni Presidente Ferdinand Marcos Jr., ang Senado ug House of Representatives nagtigom aron tapuson ang mga pending nga butang nga gideklarar nga “urgent” sa Malacañang.
Sa wala pa ang adjournment, pormal nga natapos usab ang tensyon sa Senado human giila sa mayoriya ang bag-ong liderato. Diin si Senador Sherwin Gatchalian napili isip bag-ong Presidente sa Senado, samtang ang kanhi Presidente sa Senado nga si Vicente “Tito” Sotto III ang napili nga Senate President Pro Tempore.
Samtang, si Senador Alan Peter Cayetano nagpagawas og pahayag nga nag-ingon nga iyang gidawat ug gitahod ang desisyon sa mayoriya, human niya napamatud-an nga ang kampo ni Gatchalian adunay igong gidaghanon sa mga miyembro sa kamara.
Ingon man nga daling milihok ang sesyon human ang duha ka kamara nagkauyon nga unahon ang kaayohan sa katawhan. Sa Balay Balauranan, ang ilang bersyon dali nga napasar ubos sa pagpangulo ni Speaker Faustino “Bojie” Dy III, nga gipadayon dayon sa Senado.
