Ipatawag sa Philippine National Police – Criminal Investigation and Detection Group ang mga first responder nga mitabang sa insidente sa pagkalumos sa mga Ateneo basketball players nga sila Rene Baterbonia ug Divine Adili isip kabahin sa nagpadayong imbestigasyon.
Sumala ni Camp Crame, CIDG director Maj. Gen. Robert Morico II, kapin 48 ka indibidwal na ang gipadad-an og subpoena, lakip ang mga first responder, human mibuto ang alegasyon nga adunay pulso pa si Adili sa dihang nakuha kini gikan sa dagat ug gidala sa ospital.
Gisusi usab sa CIDG ang mga taho, nga mga estudyante ug pipila ka coaching staff ang unang mihimo sa rescue operation.
Ang duha ka player namatay human malunod sa kusog nga balod atol sa usa ka training exercise sa Dipaculao niadtong Hunyo 8. Base sa post-mortem examination si Baterbonia namatay tungod sa pagkalumos, samtang naghulat pa ang mga awtoridad sa dugang impormasyon bahin kang Adili, kansang pamilya pinaagi sa Embassy of Nigeria in Manila nangayo og autopsy sa dili pa iuli ang iyang lawas ngadto sa Nigeria. Gilauman usab nga moanhi sa Pilipinas ang amahan ni Adili aron makigtambayayong sa imbestigasyon.
Samtang, giawhag ni Maj. Gen. Robert Alexander Morico II, hepe sa CIDG, ang kanhi coach sa men’s basketball sa Ateneo de Manila University nga si Thomas Anthony “Tab” Baldwin nga personal nga moatubang sa mga imbestigador nga nag-imbestiga sa kamatayon sa duha ka student-athletes.
Nagpasidaan si Morico nga ang CIDG mahimong mangayo og mga kaso sa contempt ug obstruction of justice batok niadtong dili motuman sa mga subpoena.
Ubos sa Republic Act 10973, ang hepe sa Philippine National Police, direktor sa CIDG ug deputy director gitugutan sa pag-isyu og mga subpoena atol sa mga imbestigasyon. Ang pagkapakyas sa pagtuman mahimong moresulta sa usa ka kaso sa indirect contempt sa atubangan sa Regional Trial Court.
Gihimug-atan usab sa hepe sa CIDG nga ang mga imbestigador wala mag-isip sa mga kamatayon nga aksidente.
