Giatake pag-usab sa militar sa Israel ang habagatang bahin sa Lebanon, subay sa report sa state media sa maong nasod. Nahitabo ang maong pag-atake luyo sa panawagan ni U.S. President Donald Trump nga magmapailubon ug magpabiling kalmado ang Israel batok sa Lebanon.
Sumala sa taho, ubay-ubay na ka tawo ang nangaangol human naigo sa mga drone strike ang mga dapit sa Mansouri ug Aaziyyeh, diin naglunsad usab og airstrike ang mga fighter jet sa Israel didto sa Nabatieh al-Fawqa ug Kfar Tebnit.
Wala pa mopagawas og opisyal nga pamahayag ang Israeli military kalabot sa maong mga bag-ong pag-atake. Bisan pa man niini, gibutyag sa militar sa Israel nga lima sa ilang mga sundalo ang nangaangol human giatake sa grupong Hezbollah gamit gihapon ang mga drone.
Sa pikas bahin, gipahayag sa Pakistan, nga nagsilbing tigpataliwala sa Estados Unidos ug Iran, nga lakip ang Lebanon sa kasabutan nga nagtumong sa pagtapos sa tensyon sa Middle East.
Niadtong Martes, nag-ingon si Trump nga kinahanglang magmadasigon ug responsable si Israeli Prime Minister Benjamin Netanyahu kon hisgutan ang sitwasyon sa Lebanon. Sa iyang pagtambong sa G7 Summit, gidugang ni Trump nga dugay na nga nakiggubat ang Israel sa Hezbollah ug daghan nang kinabuhi ang naapektuhan tungod sa nagpadayong kagubot.
Taliwala sa kasabutan nga gipahibalo niadtong Dominggo tali sa Estados Unidos ug Iran, padayon gihapon ang pagbayloay og pag-atake sa Israel ug Hezbollah batok sa usa’g usa.
Sa wala pa naporma ang maong kasabutan, nagpahigayon usab og airstrike ang Israel sa Beirut, ang kapital sa Lebanon, isip tubag sa rocket attack nga gilunsad matud pa sa Hezbollah.
Bisan og gipahayag ni Trump nga maayo ang iyang relasyon kang Netanyahu, giadmitar niini nga wala siya kauyon sa pipila ka mga pag-atake sa Israel ug nagtuo nga hingpit kining nasobrahan.
Samtang gihisgutan usab ni Netanyahu nga magpabilin ang pwersa sa Israel sa Lebanon hangtod gikinahanglan. Nagpasidaan usab ang labing taas nga lider-militar sa Iran nga mamahimong mag-atubang ang Israel og “harsh response” o grabi nga balos kung dili niini hunongon ang pagpanghasi sa habagatang bahagi sa Lebanon.
