Nisaka na sa 4 ang ihap sa mga namatay sa pagpamusil sa eskwelahan sa Tacloban City.
Diin ang pinakabag-ong biktima, usa ka estudyante samtang gitambalan kini sa ospital.
Gikumpirmar usab sa Philippine Red Cross (PRC) ang kamatayon sa ikaupat nga biktima alas 7 gabii.
Ingon man nga anaa sa 15 ka mga estudyante gikan sa San Jose National High School nga kasamtangang gitambalan sa ospital.
Mahinumduman nga nadakpan na sa mga awtoridad ang duha ka suspek sa maong pagpamusil, usa niini iya sa usa ka babayeng pulis samtang ang .38 caliber nga pusil narehistro sa usa ka security agency.
Samtang, nipaabot og pahasubo si Senador Bam Aquino, ang Chair sa Senate Committee on Basic Education, sa mga ginikanan sa mga estudyanteng namatay ug nipasalig nga hisgutan kini sa ilang komite.
Subling nanawagan usab si Senador Robin Padilla sa iyang mga kaubang senador nga hatagan og pagtagad ug suportahan ang iyang gisang-at nga balaodnon (Senate Bill No. 372) nga nagtumong sa pag-amyenda sa Juvenile Justice and Welfare Act (Republic Act No. 9344) aron ipaubos ang edad sa kriminal nga responsibilidad sa mga menor de edad nga nalambigit sa mga ngilngig nga krimen gikan sa 15 anyos ngadto sa 10 anyos kini nunot gihapon sa nahitabong shooting incident sulod sa tunghaan diin ang mga suspek mga menor de edad.
