Nagsugod na ang mga plano sa pagbakwit sa gatusan ka mga barko ug kapin sa 11,000 ka mga marinero nga na-stranded karon sa Gulf region human sa ceasefire tali sa Iran ug Estados Unidos.
Sumala sa International Maritime Organization (IMO) sa United Nations, nakig-alayon na sila sa mga barko sa lugar aron masugdan ang luwas nga paglayag gikan sa Strait of Hormuz.
Gipasalig usab sa IMO nga luwas ang pagbakwit alang sa mga na-stranded nga barko ug mga tripulante sa rehiyon.
Ang dakong operasyon pagahimuon uban sa kooperasyon sa Iran, Oman, Estados Unidos, ug uban pang mga kompanya.
Sumala sa Ministry of Defense sa Oman, ang pagbakwit gikatakda nga himuon sa usa ka phased o hinay-hinay nga pagluwas aron malikayan ang mga bangga sa dagat.
Sa pagkakaron, ang Traffic Separation Scheme o ang pangunang ruta sa pagpadala sa Strait of Hormuz dili gamiton. Hinuon, duha ka temporaryo nga ruta paingon sa amihanan ug habagatan sa nahisgutang agianan ang gamiton alang sa luwas nga pagbakwit sa mga barko.
Ang Traffic Separation Scheme gitukod sa International Maritime Organization niadtong 1968 aron ma-regulate ang dagan sa mga barko nga moagi tali sa katubigan sa Iran ug Oman sa Strait of Hormuz.
