Gikabutyag ni Raul Constantino, ang Presidente sa Teacher’s Dignity Coalition Central Visayas, atol sa eksklusibong pakighinabi sa Bombo Radyo Cebu kaniya, nga dugay nang namatyagan sa mga pundok sa magtutudlo nga hinay-hinay nga gikuha ug nahanaw ang katungod sa mga magtutudlo nga magdisiplina sa mga estudyante.
Atol sa eksklusibong pakighinabi kaniya, matod pa, daw ang maong mga authority sa mga magtutudlo nga modisiplina sa ilahang mga estudyante hinay-hinay nga gikuha gumikan lamang sa mga polisiya ug mga balaod nga namugna sa Pilipinas.
Dugang ni Constantino, adunay dakong kalahian ang mga kabatan-onan karon kung ikompara kaniadto. Tungod kay alang kaniya, isip usa ka produkto sa karaan nga curriculum sa DepED, kaniadto aduna pay gitanyag nga katungod sa mga magtutudlo nga modisplina sa mga bata, apan karon, iyahang naobserbaran nga gikuhaan na gayud.
Gani, gipunting ni Constantino ang balaodnong susama sa Child Protection Policy nga gibasi sa R.A. 7610, ug ingun man ang Juvenile Justice Welfare act, diin alang sa iyaha, ang mga kabatan-onan na ingun og ni-asta nga gi-pamper o giatiman pag-ayo, hinungdan nga ang mga magtutudlo di na tumang makadisiplina.
Dugang niya, impossible sa usa ka skwelahan ug usa ka batan-on nga makat-on nga dili makabaton og saktong pagdisiplina, busa alang kaniya, importante ang disipina.
Apan sa iyang obserbasyon, nahanaw na ang authority sa mga magtutudlo sa kasamtangan sa pagdisiplina sa mga tinun-an.
Busa, nanghinaot siya nga makita kini sa gobyerno, ilabi na sa Department of Education (DepED) kung unsa ka importante ang disiplina.
