Nigawas na ang resulta sa ballistics ug autopsy examination sa tulo ka estudyante nga namatay sa nahitabong pagpamusil sulod sa San Jose National High School sa Tacloban City.
Sumala sa Philippine National Police (PNP) Regional Forensics Unit 8, ang tulo ka biktima gipusil gikan sa layo nga anggulo, butang nga nagpakita nga gihimo ang pagpamusil nga walay piho o espesipikong target.
Base sa pagsusi sa mga eksperto, ang mga bala miigo sa mga kritikal ug importanteng parte sa lawas sa mga biktima, nga maoy hinungdan sa ilang hinanaling kamatayon.
Giandam na karon sa mga awtoridad ang maong katapusang forensic report aron isumite ngadto sa mga nagkupot sa imbestigasyon.
Samtang, gipahayag sa PNP nga ilang pasakahag kaso tungod sa pagpabaya ang iyaan sa 15-anyos nga suspek, kinsa usa ka pulis ug maoy tag-iya sa service firearm nga nagamit sa krimen.
Gawas niini, gitun-an usab sa PNP ang posibleng pagpasaka og susamang kaso batok sa apohan sa suspek, kinsa giingong tag-iya sa .38 caliber nga armas nga gigamit usab sa maong insidente.
Sa laing bahin, gipailalom na sa psychological first aid ang pipila ka mga magtutudlo ug kawani sa tunghaan aron matabangan sila nga makarekober gikan sa trauma sa maong trahedya.
Matud sa principal sa San Jose National High School, gilayon nilang gihisgutan ang mga safety protocol batok sa mga ingon niini nga insidente, lakip na ang hinanaling pagsira ug pag-lock sa mga pultahan sa classroom aron mapanalipdan ang mga estudyante.
