CEBU CITY- Naangol ang usa ka menor de edad nga estudyante human gipareglahan sa usa ka grupo sa mga batan-on sa New Imus Road, Barangay Day-as, dakbayan sa Sugbo, kagahapon, Hunyo 25.
Sa eksklusibong pakighinabi sa Bombo News Team, gipadayag ni Hon. Ekin R. Caniga Jr., Committee on Peace and Order sa Barangay Day-as, nga naglakaw lamang ang tulo ka menor de edad sa daplin sa karsada sa dihang kalit silang gisugat ug giatake sa laing grupo nga midagan gikan sa pikas bahin sa dalan.
Nakalikay ang duha sa mga biktima, apan naabtan ang usa ka estudyante nga gikulata ug gihapak sa ulo gamit ang screwdriver.
Giklaro usab ni Caniga nga walay laing armas nga narekober gikan sa mga batan-on gawas sa screwdriver nga gituohang gigamit sa krimen, sukwahi sa naglutaw nga mga hungihong.
Matud niya, walay bisan usa sa mga nalambigit ang residente sa Barangay Day-as, kondili gikan sa mga kasikbit nga barangay ug miagi lamang sa maong lugar.
Human sa hitabo, misibat ang siyam ka mga suspek nga pulos menor de edad ug gibanabana nga nag-edad og 15 anyos paubos.
Dugang pa ni Caniga, nga paspas nga nakaresponde ang mga pulis nga naka-duty duol sa barangay ug pinaagi sa CCTV footage ug koordinasyon tali sa barangay ug kapulisan, tulo na sa siyam ka mga suspek ang nadakpan.
Narekober usab sa mga otoridad ang screwdriver nga gituohang gigamit sa maong krimen.
Tungod niini, nakigkoordinar na ang Barangay Day-as sa mga kasikbit nga barangay ug sa Cebu City Police Office (CCPO) aron mapalig-on ang seguridad ug mapugngan ang susamang mga hitabo.
Padayon ang imbestigasyon sa kapulisan aron matino ang motibo sa maong pag-atake ug madakpan ang ubang mga suspek nga nalambigit niini.
Samtang, nanawagan si Caniga sa mga ginikanan nga bantayan pag-ayo ang ilang mga anak, ilabina kon mogawas sa gabii, ug siguruhong mahibalo sila sa mga kauban ug adtoan sa ilang mga anak aron malikayan ang susamang mga hitabo.
