Gikuwestiyon sa House trial panel ang kalit nga pagbag-o sa baruganan sa kampo ni Bise Presidente Sara Duterte human miuyon ang depensa nga ablihan ang selyadong kahon sa mga dokumento gikan sa Bureau of Internal Revenue (BIR) para sa umaabot nga impeachment trial.
Sumala sa tigpamaba sa House trial nga si Zia Alonto Adiong, samtang kini usa ka maayong lakang para sa pagpadayon sa kaso, ikatingala nganong karon lang miuyon ang depensa kung nahuman na ang pre-trial conference.
Kahinumduman nga ang mga abogado sa bise presidente kusganong misupak sa pagmarka sa gawas sa nahisgutang kahon atol sa miaging hearing.
Gipahayag usab ni Adiong ang kabalaka sa hangyo sa depensa nga magpahigayon og laing lahi nga executive session para lang sa pag-abli ug pagmarka sa kahon sa BIR.
Nagpasidaan ang magbabalaod nga kini mahimong hinungdan sa dugang nga mga paglangan sa pag-isyu sa pre-trial order ug sa pormal nga pagsugod sa husay.
Gipasabot ni Adiong nga ang pag-abli ug pagmarka sa mga dokumento wala magpasabot nga kini gidawat dayon isip ebidensya tungod kay ang Senate impeachment court gihapon ang modesisyon niini atol sa husay mismo.
Nanawagan ang prosekusyon nga likayan ang bisan unsang legal nga pasangil aron ang tanan makatutok sa pagpresentar sa ebidensya ug mga saksi sa Hulyo 6.
