Gikumpirma sa World Health Organization (WHO) nga kapin sa 1,300 ka dugang nga kamatayon (excess deaths) ang natala sa tibuok Europa sukad niadtong Hunyo 21, tungod sa grabeng heatwave nga gitawag nilang “silent killer.”
Matod ni WHO Director-General Tedros Adhanom Ghebreyesus, ang Europa mao karon ang pinakapaspas nga nag-init nga kontinente sa kalibutan, diin halos doble ang kapaspason sa pagsaka sa temperatura kumpara sa global average.
Tungod sa padayon nga grabeng kainit, minilyon ka mga residente ang naapektuhan, gipangsira ang mga tunghaan, ug nagkaproblema usab ang suplay sa kuryente sa nagkalainlaing bahin sa kontinente.
Sa France, gibana-bana nga 1,000 ka dugang nga kamatayon ang natala sukad niadtong miaging Miyerkules. Kadaghanan sa mga biktima adunay edad nga 65 anyos pataas, samtang misaka usab og 40 porsyento ang gidaghanon sa mga namatay sulod mismo sa ilang mga panimalay.
Sa Germany, natala ang 41.7°C sa lungsod sa Coschen, duol sa utlanan sa Poland, nga maoy labing taas nga temperatura nga narekord sa nasod sulod sa tulo ka sunod-sunod nga adlaw.
Nabuak usab sa Czech Republic ang rekord sa kainit human maabot ang 41.1°C sa Doksany, sa amihanang bahin sa Prague.
Sa Poland, nabuak usab ang all-time temperature record sa lungsod sa Slubice diin natala ang 40.5°C.
Gipasidan-an ni Tedros nga daghang mga balay, opisina, ug mga eskwelahan sa Europa ang wala gidesenyo aron makasugakod sa ingon ka grabeng kainit.
Nagpadayon ang kabalaka samtang ang heatwave mibalhin paingon sa sidlakang bahin sa kontinente ug posible pang mosangpot sa dugang kadaot ug pagkawala sa kinabuhi.
