Moabot sa 240,000 ka mga tawo sa Kuancheng County sa Hebei Province, China ang naapektuhan sa Bagyong Bavi human kini miigo sa nasud.
Naigo sa kusog nga pagbaha ang pipila ka mga probinsya sa amihanan ug amihanan-sidlakan sa China, diin ang pipila ka mga dalan nalubog pa tungod sa kusog nga ulan.
Hinungdan nga ang ubang mga residente midangop sa paggamit og paddleboards ug paglangoy sa mga dalan nga nahisama na sa mga suba tungod sa taas nga lebel sa tubig.
Ang mga awtoridad nag-ingon nga anaa sa mga 1,800 ka mga residente sa Kuancheng ang na-stranded, samtang ang panguna nga prayoridad sa gobyerno mao ang pagbalhin ug paghatag og temporaryo nga puy-anan sa mga apektadong pamilya.
Samtang, ang Liaoning Province gipataas sa red alert tungod sa taas nga risgo sa flash floods.
Nagpasidaan ang mga awtoridad nga ang bagyo mahimong magdala og dugang kusog nga ulan sa Jilin, Liaoning, Hebei, Shandong, Jiangsu, ug Anhui, nga mahimong mograbe ang pagbaha sa mga lugar nga giigian na sa ulan.
Sumala sa China Meteorological Administration, gilauman nga ang bagyo magdala og kusog nga sa dalugdog, hailstorms, ug kusog nga hangin sa mga bahin sa amihanan ug sentral sa China.
