CEBU CITY- Gikondena ni Philippine Coast Guard (PCG) Spokesperson Rear Admiral Jay Tarriela ang giingong pagpanghilabot sa Chinese Consul General sa Cebu sa internal nga mga kalihokan sa Pilipinas, subay sa pagsupak niini sa pagsaulog sa West Philippine Sea Victory Day.
Sa pakighinabi sa Bombo Newsteam, matud ni Tarriela, walay katungod ang bisan kinsang langyaw nga opisyal sa pag-apil o pagpanghilabot sa mga polisiya ug desisyon sa gobyerno sa Pilipinas, ilabi na sa mga isyu nga may kalabotan sa soberanya ug integridad sa teritoryo sa nasud.
Giingon usab niya nga wala pa siya makahinumdum nga adunay langyaw nga konsulado nga dayag nga nanghilabot sa mga desisyon sa gobyerno ug sa lokal nga mga opisyal sama sa nahitabo karon.
Bisan pa sa pagsupak sa Chinese Consul General, gipasalamatan ni Tarriela ang Cebu City Government tungod sa pag-aprubar sa resolusyon nga nag-ila sa 2016 Arbitral Award.
Matud niya, nagpakita kini sa lig-on nga baruganan sa lokal nga panggamhanan sa pagpanalipod sa katungod ug soberanya sa Pilipinas.
Gihisgutan usab ni Tarriela ang bag-ong pangangkon sa pipila ka mga Chinese scholars nga ang Batanes kabahin sa China.
Giklaro niya nga wala gayod mahimong kabahin sa Taiwan o China ang Batanes, ug tungod niini, ang Philippine Coast Guard, Department of National Defense, ug National Security Council dungan nga misupak sa maong naratibo aron dili kini mahimong normal nga pagtuohan.
Dugang pa niya, kasagarang gamiton sa China ang mga pahayag sa ilang mga iskolar ug state media isip paunang lakang sa usa ka kampanya sa disinformation sa dili pa kini mahimong opisyal nga posisyon sa ilang gobyerno.
Matud niya, mao kini ang hinungdan nga dali nga mitubag ang Pilipinas.
Bisan pa niini, gipasalig ni Tarriela nga wala silay namatikdan nga seryosong hulga sa seguridad sa Batanes sa pagkakaron.
Giawhag niya ang publiko, ilabi na ang mga batan-on, nga tun-an ang kasaysayan ug kamahinungdanon sa 2016 Arbitral Award aron mahimong mas andam sa pag-ila ug pagsukol sa disinformation, ug aron mapalig-on ang pagtahod sa internasyonal nga balaod ug sa soberanya sa Pilipinas.
Gipahibalo usab ni Tarriela nga nagpadayon ang suod nga koordinasyon tali sa Philippine Coast Guard, Armed Forces of the Philippines, Department of National Defense, Department of Foreign Affairs, ug uban pang mga ahensya ubos sa National Task Force for the West Philippine Sea aron mapalig-on ang seguridad sa kadagatan ug mapugngan ang pagkatap sa sayop nga impormasyon.
