Gitay-og sa usa ka linog nga adunay magnitude 7.4 ang kabaybayonan sa estado sa Chiapas sa nasod sa Mexico, hinungdan nga dinalian nga nagpagawas og tsunami warning ang mga awtoridad samtang nabati usab ang kusog nga pagtay-og sa mga silingang nasod sa Guatemala ug El Salvador.
Sumala sa United States Geological Survey (USGS), ang epicenter sa linog natala duol sa lungsod sa Puerto Madero ug adunay giladmon nga 10 kilometros.
Tungod sa kakusog sa pagtay-og, ang U.S. Tsunami Warning System dinalian nga nag-isyu og tsunami warning alang sa mga kabaybayonan nga nahimutang sulod sa 300 kilometros gikan sa gigikanan sa linog.
Kung diin, sa Guatemala City, gikataho nga grabeng nabati ang pagtay-og hinungdan nga gipabakwit sa ilang mga balay ang mga residente.
Gipabakwit usab ang mga empleyado sa mga building sa gobyerno isip kabahin sa protocol sa kaluwasan.
Nabati usab ang linog sa El Salvador nga adunay kasarangan nga kusog didto sa kaulohang dakbayan niini, apan maayo na lang kay walay gitaho nga dagkong danyos o mga namatay.
Sa pagkakaron, padayon pa nga nagmonitor ang mga otoridad sa sitwasyon samtang gisusi ang kinatibuk-ang epekto ug posibleng pinsala nga nahimo sa maong linog.
