Nagpahinumdom ang Bangko Sentral ng Pilipinas (BSP) sa tanang BSP-Supervised Financial Institutions (BSFIs) nga palig-onon ang ilang mga lakang batok sa money laundering, terrorism financing, ug proliferation financing kalabot sa mga kliyente nga nalambigit sa casino junket operations (CJO).
Ang mga CJO mao ang mga kompanya o indibidwal nga nag-arrange og mga serbisyo nga may kalabotan sa pagdula alang sa mga high-value patrons, lakip ang mga travel arrangement, credit lending, ug pag-book sa mga gaming room.
Sa giya nga papel nga gipagawas nga giulohan og “Risk Management Practices for Customers Engaged in Casino Junket Operations”, ang BSP naglatid og mga giya aron mapugngan ang paggamit sa mga BSFI isip mga conduit alang sa mga ilegal nga kalihokan sama sa money laundering, terrorism financing, ug uban pa.
Ang mga red flags nga giila naglakip sa dili kasagaran nga mga paglihok sa kwarta, komplikado nga mga istruktura sa pagpanag-iya sa mga kliyente sa korporasyon, ug layered nga mga transaksyon. Namatikdan sa BSP nga ang mga transaksyon nga naglambigit sa mga CJO adunay taas nga risgo nga magamit alang sa money laundering.
Ang dokumento nagrekomendar sa pagpalig-on sa pagdumala sa risgo sa lima ka importanteng bahin: pagdumala sa board ug senior management, pagpatuman sa programa sa pagpugong sa money laundering ug terrorism financing, hingpit nga pagdawat ug pag-ila sa kliyente, padayon nga pagmonitor ug pagreport sa kadudahang transaksyon, ug regular nga self-assessment ug pagbansay.
Gipasiugda usab sa BSP ang kasamtangang labing maayong mga pamaagi sama sa gipauswag nga due diligence para sa mga kliyente nga adunay taas nga risgo, automated transaction monitoring, client link analysis, independente nga beripikasyon sa mga regulatory agencies, ug partisipasyon sa mga inisyatibo sa pagpaambit sa impormasyon.
Gipasiugda sa BSP ang kamahinungdanon sa pagpaambit sa impormasyon taliwala sa mga supervising authorities, labi na ang BSP ug ang Philippine Amusement and Gaming Corporation (PAGCOR), lakip ang mga BSFI, aron mas epektibo nga madumala ang mga risgo.
Ang giingon nga giya nga papel gibase sa pag-analisar sa BSP sa pinili nga mga bangko nga adunay exposure sa mga transaksyon sa CJO ug junket players.
