Giangkon sa Houthi rebels sa Yemen nga sila ang responsable sa pag-atake sa duha ka Saudi oil tanker sa Red Sea.
Giila sa Houthi ang mga barkong Encelia ug Layla isip ilang gitarget.
Bisan pa sa ilang pag-angkon sa responsibilidad, wala pa kini hingpit nga napamatud-an pinaagi sa independenteng kumpirmasyon.
Sumala sa military spokesperson nga si Yahya Saree, gitarget sa ilang pwersa ang duha ka barko gamit ang mga missile ug drone tungod sa giingon nilang paglapas sa ilang naval blockade batok sa mga barkong may kalabotan sa Saudi Arabia.
Matud pa ni Saree, magpadayon ang Houthi sa ilang mga operasyon sa dagat ug sa pagpatuman sa ilang gitawag nga “siege for a siege” nga estratehiya.
Sa sayo pa niadtong Huwebes, Hulyo 23, gikumpirma sa Saudi Press Agency nga ang barkong Encelia naigo samtang naglawig sa Red Sea, nga maoy hinungdan sa sunog sa proa o atubangang bahin sa barko.
Sa pagkakaron, wala pa’y opisyal nga kumpirmasyon bahin sa gidak-on sa kadaot sa ikaduhang barko.
Apan, sumala sa mga awtoridad, luwas ang tanang tripulante ug wala’y naiulat nga nasamdan sa maong insidente.
Samtang, ang sunod-sunod nga mga pag-atake sa maong lugar nagpadako sa kabalaka bahin sa seguridad sa mga komersyal nga barko nga naglawig sa Pulang Dagat.
Tungod niini, daghang mga oil tanker ang napugos sa pag-ilis og ruta o paglikay sa Bab el-Mandeb Strait, samtang ang nagkataas nga tensyon nakatampo usab sa pagsaka sa presyo sa lana sa merkado sa kalibotan.
