Balhog sa prisohan ang usa ka SK Councilor human nanumbag sa Barangay Kapitan nga naghusay sa away sa iyahang inahan ug brother-in-law sa Barangay Dugoan, Lungsod sa Sibonga pasado alas 2 sa hapon sa Huwebes, Hulyo 23.
Ang 25-anyos nga SK Councilor usa ka babaye samtang ang gisumbag niini mao ang 52-anyos nga babayeng kapitan.
Subay sa impormasyon sa Sibonga Police Station dunay bangi ang inahan ug ang brother-in-law sa SK Councilor.
Tungod kay dili na gusto sa inahan sa SK Councilor nga papuy-on pa ang brother-in-law sa ilang balay hinungdan nga papahawaon kini, rason nga ang inahan ug ang brother-in-law gipatawag sa Barangay aron husayon sa maayong paagi.
Miangkon ang brother-in-law sa iyang sala nga nahimo ug nangayo na kini og pasaylo apan giingong wala modawat ang inahan ug gusto niya kining palayason.
Gikataho nga igsuon sa SK Councilor ang asawa sa brother-in-law,
hinungdan nga tungod sa kasuko sa SK Councilor gitulisok niya ang brother-in-law.
Hinungdan nga ang Barangay Kapitan mibadlong ug temporaryong mipagawas sa SK Councilor kay matod pa wala kini labot sa husay.
Giingong dunay nahitabong komosyon sa sulod sa Barangay Hall ug miuwang ang Barangay Kapitan apan siya na hinuon ang nasumbagan sa SK Councilor.
Nakaangkon og garas sa nawong ang Barangay Kapitan ug nabali sab ang eyeglasses niini.
Subay sa pagsuwat niining balita, anaa pa sa bilanggoan ang SK Councilor samtang mag atubang kini og kasong Direct Assault ubos sa Revised Penal Code.
