Nasikop sa mga operatiba sa National Bureau of Investigation–Central Visayas Regional Office (NBI-CEVRO) ang usa ka babaye nga gituohang nalambigit sa ilegal nga drugas atol sa buy-bust operation nga gipahigayon sa usa ka gas station sa J. Alcantara Street, Barangay Sambag 1, Dakbayan sa Sugbo niadtong Hulyo 21.
Ang dinakpan giila nga si Salome Villarino, residente sa Quiot Pardo, Cebu City.
Suma sa NBI-CEVRO, ang operasyon gibase sa mga impormasyon nga adunay mga indibidwal nga nagbaligya og illegal nga drugas ngadto sa mga drayber sa pampublikong sakyanan ug mga estudyante duol sa duha ka mga pribadong tunghaan.
Human sa surveillance, test-buy operation, ug positibong resulta sa laboratory examination, nakakita ang mga awtoridad og igo nga basehan aron ipatuman ang buy-bust operation.
Narekober sa operasyon ang unom ka heat-sealed transparent plastic sachets nga gituohang illegal nga druga ang sulod, duha ka gimarkahang ₱100 nga kuwarta nga gigamit sa buy-bust operation, ₱1,900 nga cash, ug usa ka National ID.
Base sa laboratory examination sa NBI Forensic Chemistry Division, positibo sa Methamphetamine Hydrochloride ang unom ka sachet nga adunay kinatibuk-ang gibug-aton nga 0.25 grams ug gibanabanaang nagkantidad og ₱1,500.
Gikumpirmar usab sa forensic examination nga adunay fluorescent powder sa mga kamot sa suspek, nga nagpakita nga iyang gihikap ang gimarkahang kuwarta nga gigamit sa operasyon.
Sapagkakaron, gipaubos na ang suspek sa inquest proceedings tungod sa paglapas sa Section 5 ug Section 11 sa Republic Act 9165.
