Gibarugan sa kanhing National Bureau of Investigation (NBI) Director nga si Jaime Santiago nga ang kopya sa Zoom press conference ni VP Sara Duterte niadtong Nobyembre 23, 2024, diin siya nanghulga kang Presidente Ferdinand Marcos Jr., First Lady Liza Araneta-Marcos ug ig-agaw sa presidente nga si Rep. Martin Romualdez, nga gipaubos dayon sa beripikasyon ug authentication.
Sa dihang gipangutana ang kanhing hepe sa NBI kon unsang mga lakang ang gihimo sa ahensya nga iyang gipangulohan human sa kontrobersyal nga press conference.
Sumala ni Santiago, gimandoan dayon niya ang cybercrime unit sa NBI nga analisahon ug authenticate ang leaked video, lakip na ang pagkontak sa opisina sa Meta aron masiguro ang pagkatinuod niini.
Human sa sunod-sunod nga mga authentication, gimandoan dayon niya ang pagporma og task force aron imbestigahan ang mga hulga sa bise presidente.
Ang investigating team gilangkoban sa hangtod sa unom ka abogado uban ni Dir. Santiago nga nagsilbing lider. Apil usab niini ang pipila ka mga eksperto sa cybercrime nga gikinahanglan tungod sa ilang teknikal nga kahanas.
Sumala ni Dir. Santiago, ang NBI nagpadala og mga sulat ug subpoena sa bise presidente apan wala kuno siya mopakita, bisan sa ikaduhang higayon nga siya gipatawag.
Giinsistir sa kanhing huwes nga gipahibalo usab sa NBI si VP Sara nga ilang imbestigahan usab ang mga hulga nga iyang gihisgutan sa iyang kinabuhi, apan matod niya nga ang bise presidente wala gihapon motubag sa imbitasyon sa bureau.
Gipadayon usab sa kanhing direktor nga dili angay nga isipon ang ‘Project Romanov’ isip hulga sa kinabuhi ni VP Sara, sama sa gibutyag sa Nobyembre 23 nga Zoom conference.
Sumala ni Santiago, una kining gihisgutan ni Mayor Baste Duterte sa Davao City sa wala pa ang hulga ni VP Sara. Matod niya nga ang maong pahayag usa usab ka hulga o pasidaan sa kinabuhi ni Pang. Ferdinand Marcos Jr., ug dili si VP Sara.
Giinsistir sa kanhing direktor nga natingala ang NBI sa dihang daw nag-ingon ang kampo ni VP Sara nga kini usa ka hulga batok kanila, bisan pa nga si Pang. Marcos ang nagdumala niadtong panahona.
