Pormal nga gihangyo ni Senador Rodante Marcoleta pinaagi sa pagsumite og manifesto sa Senado nga siya ug si Senador Jinggoy Estrada tugutan nga moapil sa impeachment trial ni Bise Presidente Sara Duterte.
Diin ang duha ka senador kasamtangang gitanggong sa New Quezon City Jail male dormitory sa Payatas taliwala sa ilang managlahing kaso sa plunder, nga walay piyansa, sa Sandiganbayan.
Sa usa ka interbyu kang Marcoleta sa anti-graft court uban sa iyang pagtambong sa pre-trial conference sa plunder case sa Third Division, gikumpirmar niya nga iyang gilatid sa iyang gisumite nga manifesto ang legal nga mga rason nganong ang upper house kinahanglan mangita og paagi alang niya ug kang Sen. Jinggoy nga moapil sa nagpadayon nga pagdungog sa bise presidente.
Sumala ni Marcoleta, ang iyang pagkabilanggo wala makausab sa iyang status isip usa sa 24 ka naglingkod nga senador nga sa ngadto-ngadto mobotar aron ma-acquit o makonbikto ang bise presidente.
Si Trial Presiding Officer Francis “Chiz” Escudero kaniadto miingon nga medyo miuyon siya sa sugyot ni Marcoleta nga moapil sa husay basta dili siya mag-atubang og suspensyon isip usa ka senador.
Mahinumduman nga ang kaso sa plunder ni Marcoleta naggikan sa iyang kapakyas sa pagdeklarar sa P75 milyon nga kantidad sa mga donasyon sa kampanya sa iyang Statement of assets, liabilities and net worth (SALN) ug Statement of Contributions and Expenditure (SOCE) atol sa eleksyon sa 2025.
Samtang, ang kaso batok kang Estrada naggikan sa alegasyon nga kuno nakadawat siya og P573 milyon nga kickbacks pinaagi sa mga pondo nga gisulod sa mga proyekto sa pagkontrol sa baha ubos sa 2025 national budget.
