Nakatala ang South Korea sa pinakataas nga temperatura sa kasaysayan sa nasod human mosaka sa kapin sa 41 degrees Celsius ang temperatura tungod sa padayong grabe nga heatwave.
Sumala sa Korea Meteorological Administration (KMA), nalabwan niini ang miaging nasudnong rekord nga 41.0 degrees Celsius nga natala niadtong 2018.
Sa siyudad sa Yangsan, misobra sa 40 degrees Celsius ang temperatura sulod sa tulo ka sunodsunod nga adlaw, samtang nagpadayon ang grabeng kainit nga nakaapekto sa dagkong bahin sa nasod.
Tungod niini, gipataas sa KMA ang labing taas nga lebel sa heatwave warning sa pipila ka mga lugar sa South Gyeongsang Province, samtang nagpabilin usab ang mga pasidaan sa ubang bahin sa nasod.
Giklaro sa KMA nga ang grabeng kainit resulta sa panagtapok sa North Pacific High ug Tibetan High pressure systems, nga nagdala sa init nga hangin ug nakapugong sa pagporma sa mga panganod.
Samtang nagpadayon ang heatwave, padayon usab nga gimonitor sa mga awtoridad ang Bagyong Dolphin, nga posibleng makaapekto sa kahimtang sa panahon sa Korean Peninsula sa sunod semana.
