Gipanglantawan nga mous-os ang presyo sa mga produktong petrolyo sa sunod semana human momenos ang epekto sa tensiyon sa Middle East sa presyo sa lana sa kalibotan.
Matod ni Department of Energy–Oil Industry Management Bureau (DOE-OIMB) Director Rino Abad, nag-anam og kahuyang ang epekto sa panagbangi sa Middle East, hinungdan nga nius-os usab ang presyo sa lana sa miaging upat ka adlaw.
Base sa unang forecast sa DOE, gilauman nga mokunhod ang presyo sa gasolina og P0.80 matag litro, diesel og P0.50, ug kerosene og P2.30 matag litro.
Samtang, sumala sa usa ka tinubdan gikan sa oil industry, ang rollback sa gasolina mahimong mokabat sa P1.00 hangtod P1.50 matag litro, samtang ang diesel posibleng mokunhod og P0.50 hangtod P1.00 matag litro.
Gipasabot sa DOE nga human misaka ang presyo sa Brent crude ngadto sa kapin $100 matag baril tungod sa kabalaka sa pagka-antala sa suplay, mihuyang kini tungod sa nagkadakong paglaom alang sa usa ka hunong-pabuto tali sa Estados Unidos ug Iran.
Bisan pa niini, gipasidan-an sa ahensya nga ang gipaabot nga rollback mahimong limitado lamang tungod sa nagpabilin nga hugot nga balanse sa suplay ug panginahanglan sa diesel ug gasolina.
Gilauman nga ipahibalo sa mga kompanya sa lana ang opisyal nga price adjustment karong Lunes, nga ipatuman sa kasunod nga adlaw (Martes).
