Mahimong makasinati ang mga motorista og dakong pagkunhod sa presyo sa mga produktong petrolyo sa sunod semana, tungod sa pag-ubos sa tensyon sa Middle East ug pagkusog sa peso batok sa dolyar.
Base sa paglihok sa Mean of Platts Singapore (MOPS) ug sa average nga exchange rate sa miaging upat ka adlaw, gilauman nga moubos og P4.50 hangtod P5.00 kada litro ang presyo sa diesel ug gasolina, sumala sa usa ka tinubdan sa industriya sa lana.
Matud sa tinubdan, miubos ang presyo sa krudo sa kalibutan tungod sa bag-ong paglaum alang sa diplomatikong resolusyon sa panaglalis tali sa Estados Unidos ug Iran, nga nakapakunhod sa geopolitical risk sa merkado.
Sa merkado sa Asya, mikunhod usab ang presyo sa diesel ug gasolina subay sa pag-ubos sa presyo sa krudo ug sa kahadlok sa posibleng pagkabalda sa suplay sa lana.
Nakatabang usab sa gipaabot nga rollback ang pagkusog sa peso batok sa dolyar karong semanaha.
Kasagaran, magpahibalo ang mga kompanya sa lana sa ilang price adjustments matag Lunes, nga ipatuman sa mosunod nga Martes.
