Magpagawas og documentary ang Asia’s Songbird nga si Regine Velasquez-Alcasid, diin mas masinati sa iyang mga fans ang iyang kinabuhi ug 40 ka tuig nga journey sa industriya sa entertainment .
Gipahibalo mismo ni Regine ang maong proyekto niadtong Agosto 3 pinaagi sa iyang opisyal nga Facebook page, isip kabahin sa selebrasyon sa iyang ika-40 nga anibersaryo sa showbiz.
Ang documentary nga “SONGBIRD” giprodyus sa iMusic Entertainment kauban ang GOAT Creative Studios ug gikatakdang ipasalida sa mga sinehan sa 2027.
Sa documentary, sundon ang pag-andam ni Regine alang sa iyang gihulat nga concert nga “The Finale,” samtang iyang balikan ang mga kalampusan, sakripisyo ug mga kasinatian nga nahimong bahin sa iyang talagsaong karera.
Gipakita sa teaser ang rehearsal ni Regine kauban ang beteranong musical director nga si Raul Mitra. Sa wala pa niya awiton ang iyang signature song nga “Shine,” giangkon sa singer nga nahadlok siya sa iyang umaabot nga performance.
Makita usab sa teaser ang mga litrato ni Regine sa iyang pagkabata, mga handumanan uban sa iyang namatay nang amahan nga si Mang Gerry, mga clips gikan sa iyang nangaging performances, ug mga litrato kauban ang iyang bana nga si Ogie Alcasid ug ilang anak nga si Nate.
Daghang fans ang natandog sa teaser ug mipadayag sa ilang excitement alang sa umaabot nga documentary. Pipila kanila miingon nga emosyonal na sila bisan teaser pa lamang ang ilang nakita.
Samtang, kusog usab ang suporta sa mga fans alang sa “The Finale,” human nahurot ang tickets alang sa unang concert night sulod lamang sa 45 minutos atol sa ticket selling niadtong Hulyo 30.
Kapin 50 mil ka fans usab ang mitambong sa online registration alang sa libre nga second-day show, diin nahurot ang ticket availability sulod lang sa siyam ka minutos.
Ang “The Finale” ipahigayon sa Mall of Asia Arena sa Oktubre 17 ug 18, diin si Paolo Valenciano ang stage director ug si Raul Mitra ang musical director.
