Gidayeg ni Historical Sites Development Officer II Eufemio Agbayani III sa National Historical Commission of the Philippines (NHCP) ang Pilipina tennis star nga si Alex Eala sa pagpakita og pagtahod sa nasudnong bandila.
Kini nagsunod sa usa ka video nga nag-viral diin makita ang mga fans nga nangayo og autograph gikan sa DC Open champion. Usa sa mga fans ang mitanyag nga pirmahan ni Eala ang bandila sa Pilipinas, apan matinahuron nga mibalibad ang atleta.
Basi sa Republic Act No. 8491 o ang Flag and Heraldic Code of the Philippines, ang pagsulat o pagbutang og bisan unsang marka sa nasudnong simbolo hugot nga gidili. Bisan kinsa nga molapas niini nga probisyon adunay silot.
Bisan gamay ra kini nga lihok, ang aksyon ni Eala nagpakita og daghang butang—ang iyang hugot nga pagtahod sa bandila nga iyang gipasigarbo nga gipakita matag higayon nga siya makigkompetensya sa tennis court.
