CENTRAL VISAYAS- Nagpahigayon og protesta ang mga labor group sa atubangan sa Department of Labor and Employment (DOLE)-7 sa Gorordo Avenue aron supakon ang Temporary Restraining Order (TRO) nga nakapahunong sa implementasyon sa P85 nga adlaw-adlaw nga minimum wage increase sa National Capital Region (NCR), samtang nanawagan usab sila sa Regional Tripartite Wages and Productivity Board (RTWPB)-7 nga paspason ang pag-aksyon sa ilang petisyon alang sa wage increase sa Central Visayas.
Matod ni Jay-Jay Ampoan, spokesperson sa Sentro ng Nagkakaisang Manggagawa ug mga progresibong grupo, mahimong adunay “chilling effect” sa Central Visayas ang TRO sa NCR ug mahimong makaapekto sa desisyon sa RTWPB-7 sa lokal nga petisyon sa wage hike.
Gipasanginlan usab ni Ampuan ang DOLE sa kakulang sa “urgency” sa pag-atubang sa kahimtang sa mga mamumuo, ilabina sa padayon nga pagsaka sa presyo sa mga palaliton, serbisyo ug inflation nga maoy nakapalisod sa panginabuhi sa mga trabahante.
Dugang niya, wala pa gihapon sila makabaton og pormal nga dayalogo uban sa liderato sa DOLE aron hisgutan ang ilang mga panawagan, bisan pa sa commitment sa gobyerno sa social dialogue alang sa mga mamumuo.
Ang Sentro ug Partido ng Manggagawa nagpetisyon sa RTWPB-7 alang sa P100 nga adlaw-adlaw nga wage increase, samtang ang ubang labor organizations sama sa AMASUGBUK, KMU ug PNLC nagpadayon sa pagduso sa P1,200 nga national minimum wage pinaagi sa lehislasyon.
Gihangyo usab sa mga labor group ang RTWPB-7 nga ideklarar ang supervening event aron ikonsiderar ang padayon nga pagsaka sa inflation ug presyo sa mga batakang palaliton isip basehan sa pagdali sa desisyon sa wage hike petition sa Central Visayas.
