Opisyal nang miretiro ang “Triple-Double King” nga si Russell Westbrook gikan sa National Basketball Association (NBA) human sa 18 ka season sa liga.
Gipili sa beteranong point guard nga moretiro bisan pa sa mga tanyag gikan sa nagkalain-laing mga team alang sa 2026-2027 season, lakip na ang Sacramento Kings ug Washington Wizards.
Sa pagbalik-lantaw sa iyang karera, si Westbrook napili isip No. 4 overall pick sa 2008 NBA Draft sa kanhing Seattle SuperSonics. Apan, wala siya makaduwa sa Seattle tungod kay ang franchise permanente nang mibalhin sa Oklahoma City.
Gisugdan ni Westbrook ang iyang karera dinhi diin nakaduwa siya og 11 ka season para sa Thunder uban sa ubang mga star player nga sila si Kevin Durant ug James Harden. Ang tulo nangulo sa Oklahoma ngadto sa NBA Finals niadtong 2012, apan napildi sila sa Miami Heat.
Sa panahon sa iyang pagretiro, siya gihapon ang naghupot sa rekord sa Thunder isip career leader sa points, assists, rebounds, ug steals.
Sa 2016-2017 season, nag-average siya og triple-double sa tibuok season nga may 31.6 puntos, 10.7 rebounds, ug 10.4 assists kada duwa—ang hinungdan nganong nakadaog siya sa iyang unang Most Valuable Player (MVP) award.
Sa katapusang pito ka season sa iyang karera, nibalhin siya og mga team gikan sa Thunder ngadto sa Houston Rockets, Washington Wizards, Los Angeles Lakers, Denver Nuggets, ug Sacramento Kings.
Sa iyang katapusang season (2025-2026), nakaduwa pa gani siya og 58 ka duwa para sa Kings diin nag-average siya og 15.2 puntos, 6.7 assists, ug 5.4 rebounds.
Ikalimang pwesto si Westbrook sa career assists sa kasaysayan sa NBA, samtang siya ang naghupot sa pinakadaghang triple-double sa liga.
