Mopahigayon ang Department of Education (DepEd) og usa ka nationwide school safety drill karong umaabot nga Agosto 25 agi’g tubag sa nahitabong pagpamusil nga nahitabo sulod sa usa ka tunghaan sa Zamboanga.
Ang tumong sa maong aksyon mao ang pagpalig-on sa seguridad sa mga eskwelahan ug ang paspas nga pagpugong sa bisan unsang porma sa kabangis sa mga school campuses.
Sumala usab kang Palace Press Officer Claire Castro, nga tungod sa insidente, gusto sa gobyerno nga susihon ug hunahunaon pag-usab ang sitwasyon sa seguridad ug ang kasamtangang gipatuman nga mga pagdili sa mga eskwelahan.
Pinaagi niini, mahibal-an kung unsa pa ang kinahanglan nga usbon o idugang sa gipatuman nga proteksyon para sa mga estudyante ug magtutudlo. Dugang niya nga ang gobyerno andam usab nga mogahin og dugang nga pondo aron mapalig-on pa ang mga operasyon sa seguridad sa tanang eskwelahan sa nasud.
