Labing menos 13 ka mga minero ang namatay samtang pito ang nasamdan human matabonan sa landslide ang usa ka walay lisensiyang minahan sa bulawan sa habagatang bahin sa Colombia.
Nahitabo ang insidente sa usa ka open-air artisanal gold mine duol sa Policarpa, lalawigan sa Nariño niadtong Miyerkules sa hapon.
Sumala sa mga saksi, nakadungog sila og kusog nga pagbuto pipila lang ka gutlo sa wala pa natabonan sa yuta ang mga mamumuo nga anaa sa ubos nga bahin sa minahan.
Nakuha sa mga emergency responder ug mga residente ang mga patayng lawas sa tabang sa mga digger.
Matod pa sa mga awtoridad, upat sa 13 ka mga namatay sakop sa usa ka lumad nga pamilya. Gibanabana usab nga mokabat sa 50 ka mga tawo, kadaghanan mga sakop sa Quillacinga indigenous group, ang kanunay nga nagtrabaho sa maong minahan.
Dili talagsaon ang makamatayng mga aksidente sa mga minahan sa Colombia, ilabi na sa mga walay lisensiya nga operasyon nga walay opisyal nga pagdumala.
