PROVINCE OF CEBU- Nagpahigayon og assessment ang mga personahe sa Mines and Geosciences Bureau (MGB), kauban ang mga kawani sa City Disaster Risk Reduction and Management Office (CDRRMO) ug mga opisyal sa Barangay Guadalupe, kalabot sa gitahong sinkhole sa Purok Indilicio, Barangay Guadalupe, Dakbayan sa Bogo.
Una niini, nagpatuman og hugot nga safety measures ang Bogo City Government human mitumaw ang sinkhole nga gibanabanang mosobra sa 15 metros ang gilapdon.
Matod ni Jeany Ynot, Public Information Officer sa Bogo City, misanong dayon ang CDRRMO aron mohimo og inisyal nga assessment ug magpadayon sa pagmonitor sa kahimtang sa lugar.
Gikordon sa mga awtoridad ang palibot sa sinkhole gamit ang caution tape ug gipahimutang ang 20-metros nga safety setback. Gidili usab ang pagsulod sa gikordon nga lugar ug giawhag ang publiko nga dili maglabay og basura, yuta, bato o uban pang debris ngadto sa sinkhole.
Tulo ka panimalay ang nahimutang duol sa sinkhole, diin usa niini ang kasamtangang gipuy-an.
Bisan tuod anaa kini sa gawas sa safety setback, giawhag sa local government unit (LGU) ang mga residente nga mobakwit isip precautionary measure.
Hinungdan nga nakigkoordinar ang Bogo City Government sa MGB alang sa mas detalyadong geological assessment aron matino ang posibleng hinungdan, giladmon ug kahimtang sa yuta ilawom sa maong lugar.
Gipahimangnoan usab ang publiko nga likayan ang maong lugar ug sundon ang mga safety measures nga gipatuman sa LGU samtang nagpadayon ang assessment ug monitoring.
