Hugot nga gisupak sa depensa ni Vice President Sara Duterte ang paggamit sa House Prosecution Panel og mga dili angay nga pulong atol sa nagpadayon nga impeachment trial sa Senado.
Sa ika-18 nga adlaw sa husay, gibabagan ni Defense Counsel Atty. Kristine Ferrer ang pangutana ni Prosecution Counsel Atty. Mae Divinagracia kang OVP Assistant Chief of Staff Lemuel Ortonio.
Espesipikong gisupak sa depensa ang paggamit sa mga pulong nga “mastermind” ug “architect” aron ihulagway si VP Sara kalabot sa paggamit sa confidential funds.
Gihangyo sa depensa nga tangtangon sa opisyal nga rekord sa korte ang maong mga pahayag ug pahimangnoan ang prosekusyon nga likayan ang paggamit og mga pulong sama sa “scam” ug uban pang kusog nga alegasyon nga mahimong mosangpot sa pre-judgment ug mind-conditioning.
Miuyon si Presiding Officer ug Senate President Francis “Chiz” Escudero sa mosyon ug gimandoan ang prosekusyon nga mogamit og mas angay nga mga termino sa ilang pagpangutana.
Samtang, miingon si defense team spokesperson Atty. Michael Poa nga adunay tagsa-tagsa ka estratehiya ang mga abogado sa depensa ug prosekusyon, apan nanghinaut sila nga magpabiling angay ug husto ang mga pulong nga gamiton sa umaabot nga mga hearing.
