Gitugotan sa Sandiganbayan Fifth Division ang hangyo sa prosekusyon nga bag-ohon ang charge sheet aron matangtang si kanhi DPWH Secretary Manuel Bonoan isip kaubang akusado ni Senador Jinggoy Estrada sa mga kasong plunder ug graft nga may kalabutan sa giingong flood control kickback scheme.
Sama sa gikumpirma ni Presiding Justice Geraldine Econg niadtong Martes, si Bonoan buhian tungod kay miuyon ang korte nga ibasura ang iyang mga kaso.
Tungod sa maong desisyon, gibawi na usab sa korte ang warrant of arrest ug hold departure order batok sa kanhi opisyal sa DPWH.
Tumong sa prosekusyon nga matangtang si Bonoan sa maong kaso aron makatestigo kini isip state witness sa ubang kaso sa flood control, lakip na ang master case nga naglambigit sa giingong pagpanglimbong sa nasyonal nga kagamhanan diin gihulagway nga nalambigit si kanhi House Speaker Martin Romualdez.
Sa pikas bahin, nakatestigo na usab si Bonoan sa mga kasong malversation ug graft ni kanhi Senador Ramon “Bong” Revilla Jr., diin gipadayag niya ang bahin sa “Leadership Fund” o ad-hoc allocation para sa mga prayoridad nga proyekto sa mga senador.
Bisan pa man niini, ang Second Division sa Sandiganbayan una nang nibalibad sa parehas nga petisyon sa prosekusyon sa laing nga kaso ni Bonoan.
Sa ilang resolusyon niadtong Agosto 3, gipasabot sa Second Division nga ang pagtangtang kaniya makadaot sa katungod ni Estrada tungod kay naka-arraign na kini ug makabag-o sa teorya sa kriminal nga responsabilidad sa maong kaso.
Kini subay usab sa protesta sa abogado ni Estrada nga si Atty. Laurence Arroyo, kinsa nangatarungan nga ang pagtangtang kang Bonoan makadaot sa mga katungod sa senador ug makausab sa argumento sa prosekusyon bahin sa konspirasyon.
