Gihagit ni Ombudsman Jesus Crispin Remulla si kanhing House Speaker ug Leyte 1st District Representative Martin Romualdez nga atubangon ug dawaton sa patas nga paagi ang kasong plunder nga giatubang batok kaniya may kalabotan sa giingong mga kickback sa mga proyekto sa imprastraktura sa gobyerno.
Giklaro ni Remulla nga walay pabor-pabor o espesyal nga pagtrato nga angay ihatag ngadto kang Romualdez aron mapatuman ang patas nga hustisya alang sa tanan.
Diin iyaha usab nga gipahinumdoman ang kanhing opisyal nga mas pait pa ang kahimtang sa mga ordinaryong priso sa mga pasilidad sa Bureau of Jail Management and Penology (BJMP).
Taliwala sa gipagawas nga mando sa Sandiganbayan nga ibalhin si Romualdez sa UP-Philippine General Hospital (PGH), nipahayag ang Ombudsman nga ilang hangyoon ang mga doktor sa PGH nga usbon pag-usisa ang kahimtang sa iyang panglawas aron matino kon mahimo na ba kini nga ibalik sa bilangguan sa BJMP.
Gihulagway usab ni Remulla si Romualdez nga usa ka “big fish” ug pinakataas nga ranggo nga opisyal nga nadakpan sa nagpadayong imbestigasyon bahin sa korapsyon sa mga flood control projects.
