Nakatala na og kapin sa 1,000 ang gidaghanon sa mga namatay samtang liboan pa ang padayong gipangita human sa nahitabong pagbaha sa utlanan sa Nepal ug China, usa ka semana human niigo ang maong katalagman.
Sumala sa National Disaster Risk Reduction and Management Authority (NDRRMA) sa Nepal, miabot na sa 987 ang nakit-ang patay nga lawas sa ilang bahin samtang 3,916 pa ang nawala, lakip na ang 639 ka kawani gikan sa mga hydropower station. Sa bahin sa China, 16 na ang nakumpirmang namatay ug 546 pa ang gipangita.
Sa kinatibuk-an, miabot na sa 1,003 ang opisyal nga ihap sa mga namatay ug 4,462 ang nagpabiling nawala sa duha ka nasod.
Nagsugod ang maong katalagman sa dihang nabuak ang usa ka glacier sa Mount Langtang Lirung sa Nepal nga adunay gitas-on nga 5,200 ka metros, nga miresulta sa pagdahili sa yelo ug bato nga nahimong dakong pagdahili sa yuta ug mibanlas sa mga walog sa ubos.
Ang mga lugar sa Rasuwa, Nuwakot, Dhading, Kavre, ug ang Kathmandu Valley sa Nepal natabunan sa tubig ug lapok, samtang ang border crossing sa Gyirong sa bahin sa Tibet sa China natabunan usab.
Tungod sa kadaghan sa mga nakuhang patay nga lawas, nangayo na ang Nepal og tabang sama sa mga freezer, DNA testing kit, remote-sensing technology, ug mga drone aron matabangan ang pagsubay sa mga naapektahang dapit.
Nagpadala na usab og mga search and rescue team ang China, South Korea, ug India aron motabang sa operasyon. Bisan pa niini, ang lisod nga dalan, nagkaguba nga mga dalan, ug nawala nga komunikasyon nagpabilin nga mga dagkong hagit, diin ang mga rescue team sa China nakaabot sa Gyirong border crossing human sa 10 ka oras nga paglakaw apan wala silay nakit-an nga bisan unsang mga salin sa istruktura o bilding.
