Gipasigarbo ni Senador Alan Peter Cayetano nga nakakita og dakong kausaban ang Taguig City, busa dili angay nga gub-on kini ni Senador Panfilo Lacson ug basulon siya sa mga napakyas nga proyekto.
Gisaway ni Cayetano ang mga pamahayag batok kaniya ug sa Dakbayan sa Taguig, diin iyang gihulagway ang maong mga akusasyon nga usa ka “demolition job,” “witch hunt,” ug “trial by publicity” nga gipangulohan ni Senador Lacson.
Subay sa pamahayag ni Cayetano, dili makatarunganon ang pamaagi sa pag-atake tungod kay dako na ang naangkon nga kauswagan ug katahum sa Taguig. Matud pa niya, isip usa ka pampublikong opisyal, andam siya nga atubangon ang bisan unsang imbestigasyon o pangutana bahin kaniya, apan unfair matud pa nga i-apil ang tibuok dakbayan sa Taguig, ang mga proyekto, ug ang dungog niini.
Apan giklaro ni Cayetano nga wala siya’y gidala nga kalagot sa kasing-kasing batok kang Senador Lacson, gani iyang gikutlo ang prinsipyo nga “hate the sin, but love the sinner.”
Dugang pa niya, imbes nga magpalagot, iyang gisaad nga hatagan nila og pagpatin-aw ug katin-awan (clarity) ang publiko imbes nga kalibog (confusion), ug iyang tubagon ang matag isyu o akusasyon sa hustong paagi ug sa hustong lugar o venue.
