Interesado ang United Arab Emirates o UAE ug Saudi Arabia sa pagtukod og mga pasilidad alang sa pagtipig og lana sa Pilipinas isip kabahin sa plano sa nasud alang sa strategic petroleum reserve.
Sumala ni Rino Abad, Director sa Oil Industry Management Bureau sa Department of Energy o DOE, makatabang ang maong mga pasilidad aron masiguro nga adunay suplay sa lana ang Pilipinas kung adunay global oil supply disruption.
Dugang ni Abad, ang mga gisugyot nga oil storage hub mahimong pagdumalahon sa pribado ug komersyal nga paagi, apan gusto sa gobyerno nga adunay kasabutan nga maghatag sa Pilipinas og “reserve rights” o prayoridad sa lana nga gitipig niini panahon sa krisis sa suplay.
Kung maaprobahan, target nga makaabot sa 50 milyon ka bariles sa lana ang kapasidad sa storage hub.
Samtang, ang bag-ong naporma nga team alang sa Philippine Strategic Petroleum Reserve nakigkontak na sa Saudi Arabia alang sa maong plano.
