Gigamit sa ubang estudyante ang mga peke nga school threats aron makalikay sa eksaminasyon ug uban pang schoolwork.
Kini ang gibutyag ni Police Colonel Abubakar Udang Mangelen Jr., Provincial Director sa Cebu Police Provincial Office o CPPO, atol sa iyang report sa session sa Cebu Provincial Board niadtong Setyembre 14.
Matud ni Mangelen, namatikdan sa kapulisan nga sagad mogawas ang mga bomb ug shooting threats sa social media kung duol na ang final o oral examinations, o panahon nga kinahanglan nang ipasa ang mga lisod nga academic requirements.
Tumong sa mga nagpatungha sa maong hulga nga mapugos ang mga eskwelahan sa pagsuspinde sa klase aron ma-postpone ang eksaminasyon o ma-extend ang deadline sa mga schoolwork.
Sukad niadtong Hulyo, nakatala na ang CPPO og 19 ka insidente sa threats batok sa nagkalain-laing eskwelahan sa probinsya sa Sugbo.
Gikan sa maong mga kaso, 13 na ang nasulbad, diin nailhan na ang mga suspetsado.
Sa 13 ka solved cases, siyam niini mga menor de edad.
Tungod niini, wala sila gipasakahan og pormal nga kaso sa korte, kondili gi-refer ngadto sa Municipal Social Welfare and Development Office o MSWDO alang sa tukmang intervention programs.
Padayon usab ang koordinasyon sa CPPO uban sa Regional Anti-Cybercrime Unit o RACU aron masubay ang nahabilin nga mga kaso.
Gipaningkamotan usab sa kapulisan nga mapadayon ang legal nga mga lakang batok sa mga hamtong ug sa mga mapamatud-ang tinuyo nga naghimo og pagpanghadlok online.
Gipasidan-an sa kapulisan ang mga estudyante nga dili gamiton ang mga peke nga hulga isip paagi aron makalikay sa academic requirements tungod kay mahimo kining mosangpot sa legal nga mga problema.
