Gigiyahan ni House private prosecutor Atty. James Ibrahim Bryan ang pagrepaso sa mga Statement of Assets, Liabilities, and Net Worth (SALN) ni Bise Presidente Sara Duterte atol sa pagpadayon sa pagpaminaw sa kaso, aron masusi ang iyang mga gipang-deklarar nga negosyo ug business interests gikan sa tuig 2010 hangtod 2012 samtang nagsilbi pa kini isip Bise Mayor ug Mayor sa Dakbayan sa Davao.
Gikumpirma ni Karen Batu, Officer-in-Charge sa Ombudsman’s Records Division, nga sa 2010 SALN ni Duterte, nakatala ang lima ka kompanya lakip ang Davao Emerging Taipan Corporation, Davao Bounty Times Food Corporation, City Hall King Chow Foods Corporation, SGT Fortune Horse Corp., ug CYKT Inc.
Pag-abot sa 2011, nadugang sa listahan ang Delta Matiem Salon, apan gipatin-aw sa saksi nga nakabutang sa dokumento nga ang bana sa Bise Presidente nga si Atty. Manases R. Carpio ang nakatala nga sole proprietor niini. Samtang sa 2012 SALN usab, nadugangan pa kini sa Three Kids Incorporated.
Bisan pa man sa mga nakatalang negosyo, gipatin-aw ug gikumpirma ni Batu nga walay bisan usa nga gideklarar nga shares of stock o shareholdings si Duterte sa tulo ka tuig nga gilangkuban sa maong mga SALN.
Dugang pa sa testimonya sa saksi, napamatud-an nga walay nakabutang nga bisan unsang kantidad sa acquisition cost o gigasto nga puhonan sa tanang nahisgutang negosyo. Gihimug-atan ni Atty. Bryan nga bisan adunay mga kompanyang nakatala sa opisyal nga dokumento sa Bise Presidente, nagpabilin kining walay gipakitang kantidad sa puhonan.
