Ipatuman sa kagamhanan sa Barangay Mabolo sa Dakbayan sa Sugbo, ang mga alternatibong mga paagi aron sa pagsulbad sa problema sa basura pinaagi sa Waste Segregation ug Recycling.
Gibutyag ni Atty. Daniel Frances Arguedo, nga ilang ipatuman ang maong lakang gumikan kay ang ilang Waste Management Site o WMS gidisenyo aron suportahan ang waste segregation program sa barangay.
Matud pa niini, sa ilang sistema, ang mga basura nga gikan sa mga panimalay gi-segregate na, ug ipaagi pa pag-usab sa final segregation sa WMS aron mahibal-an kung unsa ang mahimong i-recycle, i-reuse, i-compost ug unsa lamang ang kinahanglan ipadala sa landfill.
Sigon usab niini nga mokabat sa lima ka garbage trucks matag adlaw ang ilang makolekta nga basura, diin kasagaran niini mga plastik sama sa bottles, sako ug mga sachet.
Apan imbis ilabay sa landfill, ang mga plastik i-process ug i-shred aron mahimong materyales nga mahimong substitute sa sand and gravel ug gigamit kini sa barangay sa pag-restore sa ilang mga sidewalk, diin ang mga recycled materials makita usab ilawom sa pula nga surface ug yellow nga gutter.
Matud ni Atty. Arguedo dako usab ang mahimong matipid sa barangay kung maminusan ang basura nga ipadala sa landfill, ilabina kay mokabat sa 30 mil pesos ang bayad alang sa usa ka truck nga ipadala didto.
Tungod niini, iyang gidasig ang mga residente sa husto nga pag-segregate sa basura ug ang mga opisyal sa gobyerno nga sila mismo ang manguna sa information campaign aron masabtan ug masunod sa katawhan ang segregation law.
Alang kang Atty. Arguedo kung matudloan ug ma-enforce lang ang hustong paghipos ug pag-segregate sa basura, posible nga dili na kinahanglan nga magsalig pag-ayo sa landfill isip pangunang solusyon sa basura.
