Giawhag ni Atty. Daniel Frances Arguedo, ang Kapitan sa Barangay Mabolo, ang mas epektibo ug malungtarong pagdumala sa basura pinaagi sa pagpatuman sa husto nga programa sa segregation imbes nga magsalig lang sa landfill.
Atol sa eksklusibong pakighinabi sa Bombo Radyo Cebu, gipasabot niya nga ang paglabay sa basura sa landfill nagkinahanglan og dako nga gasto ug maintenance.
Sumala pa sa kaniya, base sa pagbana-bana nga gipaambit ni Cebu City Mayor Archival, kinahanglan ang amot nga P30,000 gikan sa matag kapitan ug moabot sa gibatay nga P2 bilyon kada tuig aron lang masulbad ug ma-address ang problema sa basura sa dakbayan.
Bisan pa man nga adunay dakong pondo nga gigahin alang sa paglabay sa basura, gipasiugda ni Kapitan Arguedo nga napasagdan ug nakunhuran ang paghatag og mga batakang serbisyo ug tabang ngadto sa mga residente.
Lakip na niini ang pagpalit og tambal sa CCMC, ang paghatag og pondo alang sa senior citizens assistance, labina sa mga nag-register sukad pa niadtong 2014 pataas, ug ang pagpahiluna sa tabang alang sa mga single parents ug ang pagpagawas sa allowance sa mga scholars.
Alang sa Barangay Mabolo, gipatuman nila ang ilang kaugalingong waste management program pinaagi sa pag-segregate at source o gikan mismo sa mga panimalay.
Matag adlaw, nakakolekta sila og aberids nga lima ka truck sa plastic, sama sa PET bottles, mga sako, ug sachets, nga giproseso, ug gihimong substitute sa balas ug graba alang sa pag-ayo ug pag-restore sa mga sidewalk ug gutter sa barangay.
Ang mga malata naman nga basura sama sa lamaw ug dahon gihimong compost o natural nga abono human sa usa ka bulan nga pagproseso.
Pinaagi niini nga pamaagi, kapin sa 60% sa plastic waste ug 40% sa biodegradable waste ang na-recycle ug nahimong mapuslanon nga gamit sa komunidad.
Gipatin-aw ni Kapitan Arguedo nga pinaagi sa husto nga pag-edukar sa mga tawo ug pagpatuman sa segregation law, mas dako ang ma-save sa dakbayan sa hauling services ug malikayan ang sobra nga paggasto sa landfill.
