Gibutyag ni Bohol Provincial Administrator Asteria Cabarte nga gi-isyu na ang Notice to Proceed alang sa pagpahigayon sa cloud seeding operations sa probinsya, nga naglangkob sa kinatibuk-ang 60 ka oras nga serbisyo.
Gipunting niya nga ang maong inisyatibo nga tabangan sa nagkadaiyang ahensya, diin 29 ka oras ang gikan sa Department of Agriculture pinaagi sa Bureau of Soils and Water Management, samtang ang 31 ka oras pondohan sa Provincial Government of Bohol (PGBH).
Matod ni Cabarte, naningkamot sila nga mapatuman kini sa luwas nga paagi ug samtang aduna pay higayon nga makabangon gikan sa mga epekto sa hulaw.
Ingon man nga gideklarar ang probinsya sa Bohol nga luwas gikan sa African Swine Fever (ASF), apan nagpabiling mabinantayon ang mga awtoridad sa lokal nga kagamhanan aron mapanalipdan ang industriya sa pag-atiman sa baboy lakip na ang mga micro, small, ug medium-scale nga mga Negosyo sa maong lugar.
Kini aron masiguro nga dili mokaylap ang maong sakit, gipakusgan sa kagamhanang probinsyal ang pagbantay sa mga pantalan, tugpahanan, ug sa tanang karne nga gipadala gikan sa ubang mga probinsya.
Giawhag usab sa mga opisyal ang mga lokal nga negosyante ug mga tigpadako og baboy nga hugot nga mosunod sa mga protocol sa biosafety ug mga sumbanan sa pagsulod sa produkto, aron mapadayon ang kalidad ug kaluwasan sa suplay sa karne sa baboy sa tibuok isla.
