Gikumpirma ni Atty. Michael Wesley T. Poa nga ang pagpangayo og Temporary Restraining Order (TRO) usa sa mga posibleng lakang nga mahimong himoon sa defense team ni Bise Presidente Sara Duterte kung ang isyu bahin sa gikinahanglang gidaghanon sa boto alang sa conviction ipasaka ngadto sa Korte Suprema.
Matod ni Poa, kinahanglan pa nilang timbang-timbangon ang posibleng mga benepisyo ug sangpotanan sa pagpangayo og TRO, lakip na ang mga epekto kung kini aprobahan o dili.
Hinuon, giklaro ni Poa nga wala silay tuyo nga kuwestiyonon ang integridad sa impeachment court.
Gipahayag niya nga ang ilang pag-apil sa mga proseso gihimo nga ad cautelam aron masiguro nga dili maingon nga mi-surrender o mibiya ang depensa sa ilang katungod sa pagkuwestiyon sa mga lakang ug mga desisyon nga gihimo atol sa pagdungog.
Namatikdan usab ni Poa nga lahi ang proseso sa impeachment kumpara sa naandang sistema sa korte. Diin dugang niya nga mahimong ilakip sa depensa ang mga punto nga ilang giisip nga husto o sayop sa ilang petisyon, kung modesisyon sila nga ipasaka ang maong butang.
Bisan pa niana, gipahayag ni Poa nga dili pa pinal ang ilang desisyon, tungod kay kinahanglan usab nilang konsiderahon ang baruganan ni VP Duterte.
Gihatagan niya og gibug-aton nga girespeto sa depensa ang mga opinyon sa tanang senador-huwes, bisan pa man kung pabor o dili ang maong mga opinyon sa ilang habig.
