Gilauman nga motungha sa Senado isip saksi si kanhi Senador Antonio “Sonny” Trillanes IV kalabot sa kaso nga naglambigit sa unexplained wealth ni Bise Presidente Sara Duterte.
Matod ni Atty. Benjamin Tolosa Jr., ang legal nga tigpamaba sa prosekusyon sa Kamara, si Trillanes usa sa mga dugang nga saksi nga buot ipatawag sa prosekusyon aron mohatag og testimonya bahin sa Ikaduhang Artikulo sa impeachment trial.
Naghangyo ang prosekusyon nga ipagawas ang subpoena alang kang Trillanes aron iyang ipresentar ang iyang mga alegasyon kalabot sa mga transaksyon sa bangko ug ang giingong pagdawat sa Bise Presidente og pondo gikan sa nagkalain-laing mga indibidwal ug tinubdan.
Niadtong Abril, gipadayag ni Trillanes atol sa pagdungog sa House Committee on Justice nga si Duterte ug ang iyang pamilya giingong nakadawat og kinatibuk-ang kantidad nga 181 ka milyon ka pesos gikan kang Samuel Uy, usa ka tawo nga gidudahang nalambigit sa ilegal nga droga.
Samtang, gikumpirma sa Anti-Money Laundering Council ang presensya sa mga transaksyon nga nagtugma sa mga petsa ug kantidad sa labing menos 18 ka mga transaksyon nga gihisgutan ni Trillanes, bisan pa man nga wala kini nagpamatuod sa tinubdan o katuyoan sa maong mga transaksyon.
