CEBU CITY- Nanawagan ang Bayan Central Visayas sa gobyerno nga suspensuhon ang value-added tax o excise tax sa petroleum products aron maminusan ang epekto sa padayon nga pagsaka sa presyo sa lana sa mga drayber ug konsumidor.
Matud ni Jaime Paglinawan, Chairperson sa Bayan Central Visayas, dako na kaayo ang gasto sa mga drayber sa public utility vehicles tungod sa diesel ug gasolina, samtang mokabat og 12 ngadto 14 ka oras kada adlaw ang ilang pagtrabaho.
Dugang pa niya, dili lamang ang mga drayber ang maapektuhan sa pagsaka sa presyo sa petrolyo, kundili apil ang mga pasahero, estudyante, vendors ug ubang konsumidor tungod sa posible usab nga pagsaka sa presyo sa mga produkto ug serbisyo.
Gisuportahan ni Paglinawan ang panawagan sa mga drayber nga temporaryong suspensuhon ang VAT o excise tax sa petrolyo, nga matud pa niya, mahimong makatabang sa pagpagaan sa gasto sa mga motorista.
Gikuwestiyon usab ni Paglinawan ang oil deregulation ug ang kasamtangang sistema sa pagpresyo sa petroleum products.
Matud niya, kinahanglan adunay mas dakong kontrol ang gobyerno sa industriya sa lana aron matubag ang kanunay nga pag-usab-usab sa presyo sa petrolyo.
Lakip sa iyang gisugyot ang pagbasura sa oil deregulation ug ang posibilidad nga maangkon pag-usab sa gobyerno ang Petron aron adunay government-controlled oil company.
Sumala kang Paglinawan, mahimo usab kini nga mekanismo aron ang gobyerno makapalit og petroleum products sa mas ubos nga presyo ug makatabang sa pagpagaan sa gasto sa mga motorista.
Gipasiugda usab niya ang panginahanglan sa mas taas nga sweldo alang sa mga mamumuo, ilabi na samtang nagkataas ang presyo sa mga batakang panginahanglanon.
