Gipasiugda sa Bayan Central Visayas ang Panawagan nga “Never Again, Never Forget” atol sa ika-54 nga anibersaryo sa pagdeklarar sa Martial Law karong adlawa
Tumong sa grupo nga ma-hinumduman ang mga nahitabo atol sa Martial Law ug ipaabot sa bag-ong henerasyon, ilabi na sa mga kabatan-onan, ang kahimtang sa nasud niadtong maong panahon.
Matud ni Jaime Paglinawan, chairperson sa Bayan Central Visayas, ilang gipasiugda ang panawagan nga “Never Again, Never Forget” aron mapadayon ang paghinumdom sa mga panghitabo atol sa Martial Law, lakip ang ilang giingong pagkautang sa nasud,
korapsyon ug mga paglapas sa tawhanong katungod.
Sigon niini, mahinungdanon ang paghinumdom sa mga biktima sa pagdakop, pagkabilanggo, torture ug uban pang mga paglapas sa tawhanong katungod nga natala atol sa maong panahon.
Sumala ni Paglinawan, ilang itandi ang kahimtang sa nasud kaniadto ug sa kasamtangang administrasyon ni Presidente Ferdinand Marcos Jr., diin iyang giingon nga nagpabilin ang problema sa korapsyon.
Iyang gipunto ang mga kontrobersiya sa mga flood-control project nga adunay dakong kantidad sa pondo nga nalambigit sa giingong anomalya.
Samtang, gipangandaman sa Bayan Central Visayas ang ilang protesta karong adlawa, aron ipadayag ang ilang mga panawagan alang sa accountability, transparency ug pagpanubag sa mga opisyal nga ilang giingong nalambigit sa korapsyon.
Pinaagi sa ilang kalihukan, ilang ipadayon ang panawagan nga “Never Again, Never Forget” ug ipaabot sa bag-ong henerasyon ang ilang pagtan-aw sa mga leksyon nga ilang nakuha gikan sa Martial Law.
